Ignatian Youth Camp 2024: Sa Paghanap at Pagharap

Ikaw ba ‘yan?
Tanong sa wari’y boses na bumubulong,
Tumatawag na tumugon sa paanyaya 
Sa kabila ng kaba, duda, at pangamba 

Ngunit kahit na hindi sigurado, 
Ibinigay pa rin ang ‘oo’ 
Umaasa, naniniwalang ang tinig Mo 
ang maghahatid sa akin mula simula hanggang dulo 

Ang malimit na sabihin ng iba 
Mahilig daw ‘magtago’ ang Manlilikha 
Kaya’t kailangang pagsumikapang hanapin 
Ang pagkilos at paggalaw Niya sa buhay natin 

Subalit sa naranasan ko 
Ibinunyag Mo sa akin kung ano ang totoo 
Ikaw ang siyang humahanap sa akin 
Ako’y ‘Yong pinananabikan at inaangkin 

Hinanap mo ako at Ika’y nakatagpo 
Sa mga nakasalamuhang kabataang tulad ko, 
Sa bawat ngiting sumalubong at pagtawang todo 
Sa mga pusong binuksan at mga kwentong nabuo 

Naroon ka rin sa malawak na karagatan 
Sa mga punong namumunga at halamang luntian
At paano, paano ko makalilimutan? 
Ang islang pinuno mo ng kagandahan at kabutihan 

Ipinakita mo ang ‘Yong mukha sa bawat pagsikat ng araw
Hanggang sa pagpatay sa mga ilaw 
Mula sa pinakaunang pagbati at pagpapakilala 
Maging sa mapait na pamamaalam, hanggang sa muling pagkikita 

Mas nakilala Ka pa sa mga namalas na kultura 
Natikman, nadinig, at nadama 
Mas naunawaan ang Iyong pagkadakila 
Sa lahat ng mga bagay na Iyong ginawa 

Tunay ngang ang lahat ng ito ay grasya 
At Ikaw ang pinanggalingan, sa Iyo lahat nagmula
Walang hanggang pasasalamat sa Ama 
Na sa aki’y tumawag at dito ako’y dinala 

Kaya’t kung ang lahat ng aking tinanggap ay biyaya
Di ‘man ganap na karapat-dapat ay ‘Yong pinagpala
Ngayon ay haharapin ang bawat umaga 
Tangan-tangan ang Iyong paalala 

Na ako’y tinatawag mo rin upang maging biyaya 
Sa kalikasang dapat kong pinangangalagaan 
Sa mga inaabusong dapat pinakikinggan ng lipunan
At sa kapwa kong kabataang aking kalakbay at sandigan 

Ako’y hinanap mo upang iharap sa mundo 
Ang mukha mo, ang Diyos na kawangis ko 

ni Andre Thomas Luis M. Enero, 3 AB Communication

Photos from the campers