Nine Words for Christmas: M

Siyam na Salita sa Christmas: M

Tumatanaw ang Santatlo sa mundo, nasisilayan ang kaguluhan, at nagpapasyang ipadala ang Anak sa ating piling. Umooo si Maria na maging birheng ina ng Tagapagligtas ng tao. Si Jose, sa kabila ng pangamba at kawalang-katiyakan, ay naninindigan kay Maria at sa kalooban ng langit. Sinusuway ng tatlong pantas ang tuntunin ng hari. Pinipili ng Diyos ang isang landas ng kapayakan at katahimikan, at isinisilang sa gabi sa isang abang sabsaban. Bawat isa sa mga pagpapasyang ito ay kabaliwan.

Subalit salamat at Siya ay isang Diyos ng kabaliwan – na minamahal tayo nang sapat upang kumilos sa kakaibang paraan para makasama tayo, na ang presensya ay nakagugulat sa pagiging banayad sa kabila ng kapangyarihang maaaring ipamalas, na bumabasag sa ating mga inaasahan upang makatugon sa pinakamalalim nating mga hangad at pagkalooban tayo ng mas mainam pa. At salamat na Siya ay isang Diyos ng kabaliwan sapagkat gaya ni Maria at Jose, maaari rin tayong tumugon nang may kabaliwan, at makaranas ng walang-kapantay na kalayaan at ng galak ng malalim na pag-ibig na hindi mangyayari kung hindi dahil dito.

Ang panahong ito ay sumasalamin sa kabaliwan. Ngunit hindi kabaliwang walang saysay. Sapagkat sa huli, itong tila kahangalan ay may katwiran: ang katwiran ng puso, ng puso ng Diyos para sa atin. Maaari tayong makatiyak na minahal tayo, na minamahal tayo, at patuloy tayong mamahalin sa ganitong paraan na malikhain, matatag at walang hadlang. At ipinapakita nito na sinuman tayo, anuman ang ating pinagdaanan, kaya ito ng Diyos. Walang kahit ano sa atin at walang kahit ano rito sa mundo na hindi susuungin, tatanggapin, hahagkan at pagpapanibaguhin ng baliw na pag-ibig ng Panginoon.