Lenten Reflection: Remember

Tinuturing na Buwan ng mga Kababaihan at Buwan ng Pag-iwas sa Sunog ang Marso. Sinadya man o hindi, tila may pagtutugma itong dalawang temang ito. Parehong may paanyaya sa pag-alaala: alalahanin ang mga babaeng nagdulot ng pagpapanibago at alalahaning maging maingat at manatiling ligtas. Napakagandang salita nitong pag-alaala sapagkat paanyaya itong magbalik-tanaw at huwag makalimot. Ang salitang ‘matanda’ ay tumutukoy nga rinna sa patuloy nating paglalakbay sa buhay, mas marami na tayong maaaring balikan at mas lumalalim ang paanyayang makaalala. Sa isa pang paraan, ang salitang Ingles na ‘remember’ ay maaaring tingnan bilang ‘re-member’ o maging bahagi muli.

Nasa Marso ang karamihan ng mga araw ng Kuwaresma. At marahil maaari nating gamitin ang dalawang kahulugan ng salitang ‘remember’ upang magkaroon ng malalim na paglalakbay sa panahong ito. Nawa balikan at alalahanin natin ang ginawa ng Diyos. Kasabay nito, nawa tulutan natin ang sarili na muling maging bahagi nitong salaysay – na may pagmamalay na hayaan ang Diyos na ibigin at iligtas tayo sa pamamagitan ng pagbubukas ng ating puso at buhay sa Kanyang mga paanyaya.

Bilang pagbabalik-tanaw, ano ang mga naalalamong pagkakataong nadama mo ang nakapapanatag na presensya ng Panginoon? Paano mo mabubunsod ang sarili na huwag kalimutan ang lahat ng kabiyayaan at kabutihang iyong natanggap? Paano ka mananatiling bahagi ng kuwento ng pagliligtas ni Hesus bilang tagatanggap nito at bilang instrumento nito sa iyong kapwa? Marami tayong inaalala sa buwan ng Marso. Samantalang kinikilala natin ang mga babae sa ating buhay at patuloy tayong nag-iingat sa mga aksidenteng dulot ng apoy, nawa piliin din nating kilalanin ang ating Tagapagligtas at hayaan Siyang patuloy tayong ingatan sa Kanyang yakap.