Lenten Reflection: Punctuation Marks

Bagaman tila maliliit, napakalaki ng kaibhan na maaaring magawa ng mga bantas. Halimbawa, ang paanyayang kumain kasama ng isang mahal sa buhay tulad ng ‘Let’s eat, mom’ ay ibang-ibang sa ‘Let’s eat mom’. Ang antas ng katiyakan sa pagsasabi ay makikita rin kung ang dulo ng ‘Gusto kita’ ay may tandang pananong o tuldok. At maaaring magpabago ng lagay ng ugnayan ang mensahe ng ‘Nagsisisi ako mahal kita’ kumpara sa ‘Nagsisisi ako; mahal kita’.

Pagdating sa Diyos at lalo na ngayongKuwaresma, maaari nating itanong sa sarili kung anong bantas ang kaugnayng ilan nating saloobin. Naniniwala ba tayo nang may tuldok – lubos at tiyak –o may tandang pananong – nag-aalinlangan at nagdududa? Maaari ba tayong maglagay ng kuwitkapag kinakausap ang Panginoon, na nagpapakita na kaya natin Siyang harapin attuwirang kausapin? Kung nagsasabi tayo ng ‘Mahal kita’ sa Kanya, may kasama baitong elipsis na naglalarawan ng mga nararapat Niyang tuparin para sa atinupang ibigin natin Siya nang lubos (Mahal kita kung…) o nagtatanda ngpagkaputol o pagkabitin ng ating sasabihin sapagkat may mga nililihim tayo mulasa ating Tagapaglikha?

Natatanging panahon itong mga araw na nag-aanyaya sa atin na tingnan ang ating pagtingin sa Diyos. Ganap ba ang ating paniniwala kay Hesus bilang ating Tagapagligtas? Maaari ba tayong magtiwala at maniwala sa Ama sa kabila ng ating mga tanong? Ano ang tunay na nais nating sabihin sa Diyos? Ilang linggo na lamang ang natitira rito sa Kuwaresma kung kaya nawa, kahit sa maliit na paraan, magkaroon ng kaibhan at paglalim ngayong taon ang ating pagkilala sa sarili at ang ating pagkilala sa ating Dahilan at Patutunguhan.