Lenten Reflection: Balance

Isang salitang may pitong titik lamang ang ‘balanse’ subalit kung seseryosohin ito, maaaring napakahirap nitong isakatuparan. Mula sa mga payak at mapaglarong gawain tulad ng pagbabalanse ng isang tray na puno ng pagkain, pagtantya ng tamang paghila sa goma o pagpapanatili ng isang aklat sa ulo samantalang naglalakad nang tuwid hanggang sa mga mas mahahalagang pagkilos tulad ng pagbibigay ng pantay na oras sa trabaho at pamilya, pagtitimbang sa pangangailangan ng iba-ibang tao pagdating sa pagpapasya at paglalaan ng tamang badyet para sa lahat ng pangangailangan, maaaring mapanghamon ang pagbabalanse. Subalit kinakailangan ito.

Si Hesus man ay nagtimbang din sa buhay, mga ugnayan at mga pagpapahalaga. Mula sa mga salaysay, nakita natin kung paano Niyang binalanse ang panahon sa Ama, sa pag-iisa at sa piling ng mga kaibigan at kakilala. Batid natin mula sa Kanya mismong panalangin ang panghihikayat Niya sa kababaang-loob at pagtanggap sa sarili mang pagkukulang at maging sa pagkakasala ng kapwa nang iniusal Niya ang ‘patawarin Mo kami sa aming mga sala para nang pagpapatawad namin sa nagkakasala sa aamin’. At Nakita natin ang Kanyang pagtuon sa katarungang may malasakit, pagdanas sa sakit samantalang pinipili ang pagpapatawad, pagtugon sa mga malinaw at agarang pangangailangan sa kasalukuyan samantalang nakatanaw sa walang hanggan.

Marami nang hamon ang buhay at sa tawag ng pagbabalanse sa iba-ibang aspekto ng sino tayo, samut-saring mga responsibilidad at hangad, ilang mga nararapat isaalang-alang, maaaring mas nagiging kumplikado pa ito. Subalit mayroon tayong Diyos na batid ang ating pinagdaraanan. At higit na mahalaga sa pakikiisang ito, may malalim Siyang pag-ibig sa atin na nagtataya sa pag-antabay at pagsubaybay sa lahat ng ating pagsisikap, tagumpay at maging kabiguan samantalang tumatahak tayo sa ating landas. Sa pagninilay natin sa mga susunod na katanungan, nawa manatili Siyang bukal ng kalakasan at dahilan upang ipagpatuloy ang mga pagbabalanseng kailangan nating isagawa: Aling mga bahagi ng iyong sarili at buhay ang nararapat mong bigyan ng higit na pansin at pagsasaalang-alang? Ano ang mga taglay mong nagkukulang sa pagtitimbang? Paano mo mapapalalim ang iyong pag-uugat sa mga tunay na mahalaga?