Nine Questions for Christmas – Fourth One

Sa maraming salaysay na nakapagbibigay ng inspirasyon, naririnig natin kung paano nilalampasan ang mga umiiral na hangganan, tinatawid ang mga balakid ng kasalukuyan upang galugarin ang maaari pa, at tinutungo o ipinaglalaban ang mas dakila. At kadalasan, nagsisimula ang mga ganitong kuwento sa tanong na ito:
 
Maaari kayang may mas mabuti pa?
 
Bagaman laging may mga biyaya ang ngayon at narito, kailangan lamang din nating maging malay kung gaano tayo kalaya na mamangha at tumuklas pa. Sapagkat kapag nakukulong tayo sa kasalukuyan, kapag nakatali tayo sa kung ano lang ang mayroon na, kapag hindi lumalampas ang ating paningin sa mga nakasanayan, malamang hindi na tayo tumungo o mag-isip man lang ng iba pa. At marahil kaya nga may mga salaysay rin ng pagka-alipin – literal man o hindi, mga di-mabuting pagkapit at pagsasanay, o mga paulit-ulit na pagkakamali at paikut-ikot na masamang pagpili.
 
Sino ba ang nakahula na ang mismong Tagapagligtas ang darating dito sa ating piling? Sino ba ang nakabatid na noong winika ng Panginoon na hindi Niya tayo kailanman tatalikuran ay mangangahulugan itong magiging kaisa natin Siya? Sino ba ang nakaaninag na itutulak ng Kanyang pag-ibig ang hangganan nitong mundo, na lalampasan Niya ang mga balakid ng ating pagkakasala, na ipaglalaban Niya tayo sa isang ubod nang dakila at kakaibang paraan? Salamat sa Diyos at Siya ay Diyos na humigit pa sa kung anumang binalak o pinili natin para sa ating sarili, upang palayain tayo at ipakita sa atin ang posibilidad na hindi man lang sumagi sa ating hiraya. At ito nga ang diwa ng Pasko: ang pagkakataon ng mas mabuti. Sapagkat ang mundo kalakbay ang Mesiyas, bagaman hindi man lang nawari bago ito nangyari, ay tunay na nagtataglay ng higit na liwanag at buhay kaysa sa kung naiwan tayo sa kung anong umiiral na. Ngayong mga araw, nawa piliin nating kilalanin at makasama Siya na may higit na mabuting mga inilalaan para sa atin.