Nine Questions for Christmas – Fifth One

Nagtatanong ang mga kaloobang naghahanap at naghahangad: mayroon ba tayong tahanan?
 
Bawat isa sa atin ay may pangangailangang maging bahagi ng samahan. Walang tatanggi sa kapanatagan at katiyakan. At lahat tayo ay nag-aasam sa diwa ng tahanan. Katunayan, marami sa atin ang nagdi-disenyo at nagsasaayos ng ating mga bahay hindi lamang para makapagbigay ito ng pisikal na ginhawa kung hindi para rin makapagpadama na may uuwian ang kalooban. Kumakapit tayo sa mga pagkakataong maaari lamang tayong magpaubaya, na batid nating tanggap ang totoo nating pagkatao at na ligtas tayo. At ngayong mga araw, marahil dumadalo tayo sa mga pagtitipon at pagsasalu-salo upang muling isabuhay at bigyang-patunay ang mga ugnayan, samahan, pag-uwi sa tahanan.
 
Noong ipinanganak si Hesus, iniwan Niya ang tahanan ng Kanyang Ama upang makasama tayo. At walang ibang dahilan kung bakit Niya ginawa ito kung hindi para ipabatid sa atin na kasama natin ang Diyos. Na makakasumpong tayo ng kapanatagan at katiyakan sa Kanya. Na kahit pa mabagabag o malito tayo rito sa mundo, hindi magbabago ang katotohanang may tahanan tayo sa Kanyang mga balak at sa Kanyang puso.
 
Tahanan. Sa pagtatapos ng bawat araw, sa gitna ng mga mapanghamong kalagayan, at sa mga pagkakataong maayos ang buhay, ang nagkakaloob sa atin ng kapayapaan at ang bumubuo sa ating kaligayahan ay ang pag-uwi sa tahanan. Sa panahong ito ng mga pagdiriwang at pagsasaya, isang mabuting hangarin para sa isa’t isa ang nawa magkaroon tayo lagi ng tahanang mapupuntahan at mababalikan. At hindi ito hangaring iguguhit sa hangin sapagkat sa isang di-mawari ngunit tiyak na paraan, isinakatuparan na ito ng Diyos nang ipinadala Niya ang Kanyang Anak sa ating piling.