Lenten Reflection: The Names We Are Called

Para sa ilan sa atin, tinatawag tayo sa iba-ibang pangalan para sa iba-ibang bahagi ng ating buhay, iba-ibang pangkat ng taong nakakilala sa atin, o iba-ibang lugar na ating napuntahan. Maaaring ‘Totoy’ tayo sa bahay na sumasalamin sa pagiging bunso ano pa man ang naisakatuparan na natin sa buhay, ‘RBB’ sa trabaho kung saan tinatawag ang mga pinuno sa titik ng kanilang pangalan, ‘Berth’ sa mga kamag-aral sa high school, at simpleng ‘R’ sa mga pinakamalapit sa atin. Nakakaaliw ang kasaysayan at kahulugan niyang iba-ibang pangalan lalo pa’t tumutukoy lamang ang mga ito sa iisang tao, na may samu’t saring mga karanasan at ugnayan.

Tinukoy rin tayo ng Diyos sa iba-ibang pangalan. Sa Bibliya, mababasa nating tinawag tayong mga ‘anak’, ‘tagapagmana’, ‘pinili’, ‘kaibigan’, ‘walang bahid’ kabilang ng iba pang mga salitang ibinansag Niya sa atin. At sa kanya-kanya nating puwang, kung hahayaan ang sarili na magkaroon ng mga pagkakataon ng malalim na pakikipagtagpo sa Kanya, maaari rin nating marinig kung sino tayo sa Kanya sa isang personal at natatanging paraan. Sa kailaliman ng lahat ng ito, may isang pangalan, pagkilala at pagpaparangal na iginawad sa atin ang Panginoon: Kanyang iniibig.

Ang katotohanan ay kahit sino pa tayo sa kapwa at sa mundo, anuman ang ating ginawa o hindi ginawa, paano man nating tingnan o tukuyin ang Diyos, nananatili ang pagkakakilanlan Niya sa atin. Ang pagka-iniibig natin sa mata ng Panginoon ay hindi nakasalalay sa atin, sa halip sinasalamin nito ang Kanyang puso at ang Kanyang pagpili na patuloy tayong mahalin. Maaari nating tanungin ngayon: kung lumilingon ako kapag tinatawag sa anumang pangalan sa akin ng iba-ibang tao, bumabaling din ba ako kapag binubulong ng Diyos na iniibig Niya ako? Anong higit, anong iba pa, ano iyong kailangan ko upang hayaan ang sarili na maging lubusang kaisa Niya? Ano ang kahulugan ng pagdurusa ni Kristo sa krus sa akin, sa kung sino ako at sa kung anong pagkatao ang nais ko?