Lenten Reflection: God Is In the Father

Tunay na tungkol sa pagdurusa ng Panginoon ang Kuwaresma. At dahil tila may agwat sa pagsasalaysay ng Kanyang buhay kung kaya wala tayong masyadong alam tungkol sa Kanyang kabataan, pagbibinata, pamilya at tahanan, maaaring mas madaling isipin at balikan si Hesus sa mga huling araw Niyang iyon. Sa pagkakabatid natin sa Kanyang kuwento ng sakripisyo para sa atin, katauhan at pagkiling na maging Tagapagligtas natin, maaari nating maunawaan ang biyaya at misyong natanggap Niya mula sa Kanyang Ama sa langit. Subalit huwag nating kalimutan na may ama rin Siya sa lupa na humubog sa Kanya at tumulong sa Kanyang pagiging Mesiyas sa isang tahimik at payak na paraan.

Bilang kapistahan ngayong araw ng taong-ama ni Kristo, maaari tayong bumaling kay San Jose at kilalanin na mayroon din siyang bahagi sa mga pagpili ni Hesus at sa gayon, sa kaligtasan ng bawat isang taong pinag-alayan Niya ng Kanyang buhay. Gaya sa mahalagang pangyayari ng pagtatapos sa paaralan kung kailan binabati natin hindi lamang ang mag-aaral na umaakyat sa entablado kung hindi maging ang magulang na nagbanat ng bunto upang mapangyari ito, maaari rin nating bigyang-halaga si Jose. Kaugnay nito, bagaman hindi na siya nabanggit sa mga panahong dumaraan na sa hirap si Hesus, mahihinuha rin natin ang kanyang pighati sa sakit na pinagdaanan ng taong siya mismo ang nagpalaki.

Totoong ang Diyos ay nasa Anak. Subalit hindi natin maitatanggi na ang Diyos ay nasa ama rin, lalo noong niyakap niya si Maria at Hesus bilang pamilya at hanggang sa bawat mapagmahal na pagpili ni Hesus na pinalakas ni Jose sa pamamagitan ng kanyang halimbawa at kalinga. Ngayong araw, maaari tayong lumapit sa kanya upang tulungan tayong higit pang silayan si Kristo. Maaari tayong humingi ng tulong sa kanya at sabihing: puede mo ba akong hikayatin upang higit ko Siyang kilalanin at maniwala ako nang may mas malalim na paninindigan sa kaligtasang ipinagkaloob Niya sa akin? Puede mo ba kong turuan ng mga paraan upang lalo Siyang hayaang maging aking Diyos? Puede mo ba kong gabayan sa parehong paraang ginabayan mo Siya upang tunay Siyang maging Anak ng Ama?