48th University Service Awards special features: Jocelyn Mendoza

Image

Since 1978, Ateneo de Manila University has been honoring its employees with the University Service Awards, recognizing their dedication and commitment to the University’s mission. Now in its 48th year, the University Service Awards continue to celebrate employees from all units whose service contributes to the growth and strength of the Ateneo community.

We’re excited to introduce some of this year’s awardees, who will share their stories, favorite places on campus, and reasons for staying at Ateneo.

Meet Jocelyn of Ateneo Grade School and a 35-year service awardee.

Why Ateneo?

Kapag tinatanong ako, “Bakit Ateneo?” Ang sagot ko ay simple: naging tahanan ko ang Ateneo at sa paglipas ng mga taon,natagpuan ko hindi lamang isang lugar ng trabaho kundi isang pamilya. Itinuro sa akin ng Ateneo na mahalaga ang bawat papel— maging ako man ay isang kawani na tahimik na sumusuporta sa likod ng mga gawain .

Natutunan ko ang pagpapahalaga ng magis at cura personalis —na kahit maliit na gawain, kapag ginawa nang may pagmamahal,ay nagiging bahagi ng mas dakilang layunin. Hinubog ng Ateneo hindi lamang ang aking karera kundi pati angaking pagkatao. Itinuro nito sa akin ang kahalagahan — na ang ating trabaho ay hindi lamang para sa ating sarili, kundi para sa paglilingkod sa iba at sa komunidad. Natutunan ko na ang kahusayan ay hindi nasusukat sa mga parangal lamang kundi satapat na puso, malasakit sa kapwa, at walang sawang paglilingkod na ating isinasabuhay.

Sa gitna ng mga hamon at tagumpay, natutunan ko sa Ateneo na ang tunay na paglago ay nagmumula sa pagtitiyaga, at ang tunay na pamumuno ay nakaugat sa kababaang-loob at malasakit sa kapwa. Ang mga kaibigan, guro, at estudyanteng nakasama koay naging mahalagang bahagi ng aking paglalakbay.

Ateneo is my home, dahil dito ko natagpuan ang aking direksyon, ang aking komunidad, at ang inspirasyong nagtutulak sa akin na mamuhay nang may kabuluhan, kababaang-loob, at tunay na serbisyo.

What keeps you going?

Sa loob ng tatlumpu’t limang taon ng aking paglilingkod sa Ateneo, hindi lamang ako nakatanggap ng pagkakataong magtrabaho, kundi nakaranas din ako ng mga biyayang tunay na nakapagpabago ng buhay. Isa sa pinakamahalagang bagay na ipinagkaloob ng Ateneo ay ang mga benepisyo sa edukasyon at kalusugan.

Ang benepisyo sa edukasyon ay isang napakalaking biyaya para sa aking pamilya. Ngayon, ang aking anak ay nakakapag-aral sa kolehiyo dahil sa tulong na ito. Bilang isang magulang, walang mas hihigit pang kasiyahan kaysa sa makita ang sariling anak na nagkakaroon ng pagkakataong makamit ang kanyang mga pangarap. Ang Ateneo ay hindi lamang nagbigay ng suporta sa akin bilang kawani, kundi nagbukas din ng pintuan para sa mas maliwanag na kinabukasan ng aking anak.

Ang benepisyo naman sa kalusugan ay nagbigay sa akin ng kapanatagan—na anumang hamon sa kalusugan ay may kasamang suporta mula sa institusyon. Hindi ko kailanman naramdaman na nag-iisa ako, sapagkat naroon ang Ateneo upang tiyakin na may kasangga ako sa mga panahon ng pangangailangan.

Nanatili din ako dahil sa mga Headmaster, Administrador at mentor na nagbigay-inspirasyon at nagtiwala sa aking kakayahan, sa mga kasamahan na naging pamilya, at sa mga estudyanteng naging bahagi ng aking paglalakbay. Bawat araw ay may dalang hamon, ngunit may kaakibat ding pagkakataon upang matuto, maglingkod, at makapagbigay ng pagbabago. Kaya’t masasabi ko na ang aking pananatili sa Ateneo ay hindi lamang dahil sa trabaho, kundi dahil sa pakiramdam na ako at ang aking pamilya ay tunay na bahagi ng pamayanang ito. Ang Ateneo ay naging tahanan, kaagapay, at katuwang sa paghubog ng mas magandang kinabukasan para sa amin.

Favorite memory at work?

Habang binabalikan ko ang aking 35 taon ng paglilingkod sa Ateneo, napagtanto ko na ang aking mga paboritong alaala ay hindi lamang tungkol sa isang kaganapan, kundi sa napakaraming karanasan sa paglipas ng panahon. Naalala ko ang mga retreat — yaong tahimik na sandali ng pagninilay kung saan nagkaroon ako ng pagkakataong huminto, balikan ang aking paglalakbay, at mag-focus sa aking layunin. Nagbigay ito sa akin ng lakas at nagpapaalala kung bakit ako nanatili. Naalala ko rin ang mga educational field trip, na nagpapaalala sa akin na ang edukasyon ay nabubuhay sa pamamagitan ng mga karanasan. pagtuklas ng mga bagong lugar at ideyana nagbigay sa akin ng tuwa at nagpatibay sa akin ng kahalagahan ng aming gawain.

Malapit din sa aking puso ang mga outreach program. Nagbigay ito ng pagkakataon na makapaglingkod sa mga komunidad sa labas ng kampus, maibahagi ang misyon ng Ateneo sa malasakit at paglilingkod, at makita kung paanong ang maliliit na gawa ng kabutihan ay nagdudulot ng malaking pagbabago sa buhay ng iba. Ipinaalala nito sa akin ang misyon ng Ateneo sa kapwa.

Hindi ko malilimutan ang napakaraming aktibidad sa paaralan — mula sa mga fair, pagdiriwang, sportsfest, hanggang sa mga kultural na programa — kung saan ang halakhak, pagtutulungan, at pagkamalikhain ay laging nangingibabaw. Ang mga acquaintance party, Christmas party, at maging ang mga birthday celebration na may temang kasuotan ay nagbigay ng kasiyahan at higit pang nagpatibay ng samahan sa aming komunidad. Ang

bawat kaganapan ay nagsilbing pagkakataon upang mas mapalalim ang ugnayan, maipakita ang pagkakaisa, at maitaguyod ang matibay na pagkakaibigan. Sa mga sandaling iyon, higit kong naramdaman na ang Ateneo ay hindi lamang isang lugar ng trabaho, kundi isang tunay na tahanan na nagtataguyod ng pamilya at pagkakapatiran. 

Pinahahalagahan ko rin ang mga pagkakataong kabahabi ang mga kawaani sa paghahanda para sa PAASCU Accreditation and JBEC gatherings, at Fiesta celebrations. Ang mga araw puno ng trabaho, sabayang pagkain, at pagtutulungan ay nagpakita ng dedikasyon at passion ng komunidad ng Ateneo ngunit napakasarap sa pakiramdam dahil ang lahat nagtutulungan para sa katuparan ng isang mas malaking layunin.

At siyempre, hindi ko rin malilimutan ang mga seminar at training na aking nadaluhan sa paglipas ng mga taon. Nagbigay ang mga ito ng pagkakataon upang matuto ng mga bagong kasanayan, umunlad nang propesyonal, at magbahagi ng kaalaman na nakapagpayaman hindi lamang sa aking trabaho kundi maging sa komunidad na aking pinaglilingkuran. Ang mga alaala na ito ay espesyal dahil higit pa sila sa mga kaganapan; sila ay mga tanda ng paglago, paglilingkod, at pakikipagkapwa tunay nga bawat taon sa Ateneo ay puno ng kabuluhan, paglago, at kagalakan.

Favorite spot on campus

Isa sa aking paboritong lugar sa Ateneo Grade School ay ang Chapel of the Holy Guardian Angles. Para sa akin, ito ay higit pa sa isang kapilya — ito ang tahanan ng aking pasasalamat at panalangin. Ang AGS Chapel ay naging saksi sa aking mga panalangin, sa aking mga pag-aalinlangan, at sa aking mga pasasalamat. Ito ang lugar kung saan ako humuhugot ng inspirasyon upang magpatuloy, at kung saan ko nararamdaman ang malalim na ugnayan sa komunidad at sa Diyos. Kaya’t para sa akin, ito hindi lamang isang lugar ng pagsamba, kundi isang banal na kanlungan na patuloy na nagbibigay-lakas, pag-asa, at direksyon sa aking paglilingkod.

Naalala ko pa noong unang araw ko sa Ateneo, dito ako dumaan bago pumunta sa department kung saan ako na-assign. Sa tahimik na pag-upo, naaalala ko na ang aking trabaho ay hindi lamang para sa Ateneo kundi para sa Diyos, at ang pananaw na iyon ang nagpapanatili sa akin sa tamang landas.

Most important lesson you’ve learned?

Sa aking mahabang paglilingkod sa Ateneo Grade School, natutunan ko na ang pinakamahalagang aral ay ang kahalagahan ng pananampalataya, paglilingkod, at pagmamahal sa kapwa. Ang bawat araw ay nagpaalala sa akin na ang tunay na tagumpay ay hindi nasusukat sa dami ng nagawa o sa haba ng pananatili, kundi sa kung paano mo naibahagi ang iyong sarili sa iba, sa pagiging mapagpakumbaba, at sa pagiging tapat sa institusyong pinaglilingkuran.

Natutunan ko rin na ang pagtutulungan at pakikipagkapwa ay pundasyon ng isang masiglang samahan. Kapag sama-sama, mas nagiging magaan ang bawat hamon, at mas nagiging makabuluhan ang bawat tagumpay. Sa mga oras ng pagod at hirap, ang pagkakaisa ng mga kasamahan ay nagsilbing lakas upang magpatuloy.

Ang Ateneo ay nagturo sa akin na ang trabaho ay hindi lamang tungkulin, kundi isang misyon ng paglilingkod na nakaugat sa pananampalataya, malasakit, at pagmamahal.

Salamat ATENEO!